ព័ត៌មានតាមបណ្តារខេត្ត

ខេត្តស្ទឹងត្រែង៖ នៅថ្ងៃទី១៧ ខែកញ្ញា ឆ្នាំ២០២៦នេះ អង្គភាពអនុវត្តកម្មវិធីថ្នាក់ខេត្ត ដឹកនាំដោយ លោក សយ គា អនុប្រធានមន្ទីរអភិវឌ្ឍន៍ជនបទខេត្តស្ទឹងត្រែង បានរៀបចំកិច្ចប្រជុំផ្សព្វផ្សាយស្តីពីគម្រោងទឹកស្អាត និងការបោះឆ្នោតជ្រើសរើសគណៈកម្មការទឹកសហគមន៍ (WMC)។ កិច្ចប្រជុំនេះមានការចូលរួមពីសំណាក់ប្រធានក្រុមប្រឹក្សាឃុំ, មេភូមិ និងប្រជាពលរដ្ឋក្នុងមូលដ្ឋាន សរុបចំនួន ៩៦នាក់ (ក្នុងនោះស្រ្តីមានចំនួន ៧៣នាក់)។

ខេត្តស្ទឹងត្រែង៖ នៅបរិវេណមន្ទីរធម្មការនិងសាសនាខេត្តស្ទឹងត្រែង នាព្រឹកថ្ងៃព្រហស្បតិ៍ ៦កើត ខែភទ្របទ ឆ្នាំមមី អដ្ឋស័ក ព.ស.២៥៧០ ត្រូវនឹងថ្ងៃទី១៧ ខែកញ្ញា ឆ្នាំ២០២៦នេះ បានរៀបចំពិធីប្រគល់-ទទួល និងចែកធុងសំរាមចំនួន ២៧៩ ធុង ដែលជាអំណោយដ៏ថ្លៃថ្លារបស់សប្បុរសជន តាមរយៈក្រសួងធម្មការនិងសាសនា ផ្តល់ជូនមន្ទីរធម្មការនិងសាសនាខេត្តស្ទឹងត្រែង ដើម្បីចែកប្រគេន-ជូនដល់ព្រះសង្ឃ និងគណៈកម្មការគ្រប់បណ្តាវត្តទូទាំងខេត្ត សរុបចំនួន ៩៤ វត្ត។

ខេត្តស្ទឹងត្រែង ទទួលបានអណ្តូងទឹក ចំនួន ១៥៣អណ្តូង ជីកស្រះទឹកមានរៀបថ្មការពារ ចំនួន ៣ស្រះ និងសាងសង់បន្ទប់ម៉ាស៊ីនចម្លោះទឹកស្អាត ចំនួន ១កន្លែង នឹងចាប់ផ្តើមធ្វើការសាងសង់ ចាប់ពីខែកញ្ញា ឆ្នាំ២០២៦ តទៅ របស់គម្រោងផ្គត់ផ្គង់ ទឹកជនបទ ជំហាន ៣ ក្នុងក្របខ័ណ្ឌហិរញ្ញប្បទានឥតសំណងពីរដ្ឋាភិបាល នៃសាធារណរដ្ឋ ប្រជាមានិតចិន តាមរយៈក្រសួងអភិវឌ្ឍន៍ជនបទ។

ខេត្តស្ទឹងត្រែង៖ នៅសាលប្រជុំសាលាខេត្តស្ទឹងត្រែង នាថ្ងៃទី១៥ ខែកញ្ញា ឆ្នាំ២០២៦ គណៈប្រតិភូគណៈកម្មការផែនការ វិនិយោគ កសិកម្ម រុក្ខាប្រមាញ់ នេសាទ អភិវឌ្ឍន៍ជនបទ បរិស្ថាន ធនធានទឹក និងឧតុនិយម (គណៈកម្មការទី៣ នៃព្រឹទ្ធសភា) ដឹកនាំដោយ ឯកឧត្តមបណ្ឌិត ម៉ុង ឫទ្ធី ប្រធានគណៈកម្មការ បានអញ្ជើញជួបពិភាក្សាការងារជាមួយថ្នាក់ដឹកនាំខេត្ត ក្រុង ស្រុក ឃុំ សង្កាត់ និងមន្ទីរជំនាញពាក់ព័ន្ធ។

ខេត្តស្ទឹងត្រែង៖ អង្គភាពអនុវត្តកម្មវិធីខេត្តស្ទឹងត្រែង ដឹកនាំដោយ លោក សយ គា អនុប្រធានមន្ទីរអភិវឌ្ឍន៍ជនបទខេត្តស្ទឹងត្រែង និងជាប្រធានអនុវត្តកម្មវិធីថ្នាក់ខេត្ត បានដឹកនាំក្រុមការងារបច្ចេកទេស រួមជាមួយក្រុមទីប្រឹក្សា TA-ADB បន្ទាប់ពីចុះជួបជាមួយគណៈកម្មការទឹក(WMC) ព្រមទាំងសហគមន៍អ្នកទទួលនៅភូមិកាតូត ឃុំកំភុន ស្រុកសេសាន កាលពីរសៀលថ្ងៃទី១៤ ខែកញ្ញា រួចមក។ នៅថ្ងៃទី១៥ នេះ អង្គភាពអនុវត្តកម្មវិធីខេត្តស្ទឹងត្រែង តែបន្តចុះជួបដល់មូលដ្ឋានជាក់ស្តែង ជាមួយអាជ្ញាធរឃុំ ភូមិ គណៈកម្មការគ្រប់គ្រងទឹក (WMC) និងប្រជាពលរដ្ឋជាអ្នកប្រើប្រាស់ទឹកស្អាតជនបទ នៅក្នុងភូមិកោះព្រះ ឃុំកោះព្រះ ស្រុកសៀមបូក និងភូមិអូររៃ ឃុំអូររៃ ស្រុកថាឡាបរិវ៉ាត់ ខេត្តស្ទឹងត្រែង។

នារសៀលថ្ងៃទី១៣ ខែកញ្ញា ឆ្នាំ២០២៦ ស្នងការដ្ឋាននគរបាលខេត្តស្ទឹងត្រែង បានរៀបចំពិធីបង្ហាញមុខជនសង្ស័យសរុបចំនួន ៣៤នាក់ (ស្រី ១នាក់) ពាក់ព័ន្ធករណីជួញដូរ រក្សាទុក និងប្រើប្រាស់ដោយខុសច្បាប់នូវសារធាតុញៀន បន្ទាប់ពីកម្លាំងជំនាញបានបើកប្រតិបត្តិការស្រាវជ្រាវ និងបង្ក្រាបបានជាបន្តបន្ទាប់នៅតាមគោលដៅចំនួន ៨កន្លែង ក្នុងភូមិសាស្ត្រខេត្តស្ទឹងត្រែង។

ខេត្តស្ទឹងត្រែង៖ លោក សយ គា អនុប្រធានមន្ទីរអភិវឌ្ឍន៍ជនបទខេត្តស្ទឹងត្រែង និងជាប្រធានអនុវត្តកម្មវិធីថ្នាក់ខេត្ត (PIU) បានដឹកនាំក្រុមការងារ សហការជាមួយក្រុមការងារបច្ចេកទេសគ្រប់គ្រងកម្មវិធី (PMU) និងទីប្រឹក្សាបច្ចេកទេស (PIC) ចុះពិនិត្យវឌ្ឍនភាពការងារសាងសង់ប្រព័ន្ធចែកចាយទឹកសហគមន៍ ដែលស្ថិតនៅភូមិវាលដេញ ឃុំអន្លង់ជ្រៃ ស្រុកថាឡាបរិវ៉ាត់ ខេត្តស្ទឹងត្រែង នាថ្ងៃទី១០ ខែកញ្ញា ឆ្នាំ២០២៦ ។

លោក ហ៊ុន បូរិន នាយករង រដ្ឋបាល ខេត្ត ស្ទឹងត្រែង ត្រូវ បាន ប្រកាស ចូលកាន់តំណែងជាប្រធានទីស្នាក់ការត្រួតពិនិត្យច្រកទ្វារព្រំដែនអន្តរជាតិត្រពាំងក្រៀលជាផ្លូវការកាលពីថ្មីៗនេះ ក្នុងគោលបំណងពង្រឹងប្រសិទ្ធភាពការងាររដ្ឋបាល សម្រួលកិច្ចការពាណិជ្ជកម្ម និងទប់ស្កាត់រាល់សកម្មភាពឧក្រិដ្ឋកម្មឆ្លងដែន តាមបទបញ្ជាយ៉ាងម៉ឺងម៉ាត់របស់រាជរដ្ឋាភិបាល។

នៅរសៀលថ្ងៃទី៥ ខែកញ្ញា ឆ្នាំ២០២៦ ស.ស.យ.ក. ខេត្តស្ទឹងត្រែង បានរៀបចំជំនួបវាគ្មិនពិសេស «ភាពជាអ្នកដឹកនាំ និងនវានុវត្តន៍» ក្រោមគម្រោងមនសិការពលរដ្ឋល្អ នៅសាលាខេត្តស្ទឹងត្រែង ដើម្បីពង្រឹងសមត្ថភាព និងដាស់ស្មារតីយុវជនប្រមាណ ៣០០នាក់។

ខេត្តស្ទឹងត្រែង៖ នៅថ្ងៃទី៥ ខែកញ្ញា ឆ្នាំ២០២៦ ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ បានចាត់ ឯកឧត្តម ប៉ែន ពេជ្រសាលី រដ្ឋលេខាធិការ និងជាប្រធានលេខាធិការដ្ឋានគណៈកម្មការគ្រប់គ្រង និងសម្របសម្រួលគម្រោងវិនិយោគសាធារណៈនៃក្រសួងអភិវឌ្ឍន៍ជនបទ បានដឹកនាំប្រតិភូក្រុមការងារបច្ចេកទេសក្រសួង អមដំណើរដោយ លោកប្រធាន អនុប្រធានមន្ទីរអភិវឌ្ឍន៍ជនបទខេត្តស្ទឹងត្រែង ចុះពិនិត្យ និងវាយតម្លៃបញ្ចប់ការងារលើគម្រោងអភិវឌ្ឍន៍ហេដ្ឋារចនាសម្ព័ន្ធជនបទចំនួន ៣ ក្នុងខេត្តស្ទឹងត្រែង។ សមិទ្ធផលហេដ្ឋារចនាសម្ព័ន្ធជនបទទាំង ៣ នោះរួមមាន៖កំពង់ដរ ផ្សារសហគមន៍អន្លង់ស្វាយ ផ្លូវកៅស៊ូពីរជាន់ (DBST)។

នាព្រឹកថ្ងៃទី៤ ខែកញ្ញា ឆ្នាំ២០២៦ គណៈកម្មាធិការមូលដ្ឋានសមាគមមន្ត្រីរាជការស៊ីវិលក្រសួងមហាផ្ទៃ ប្រចាំសាលាខេត្តស្ទឹងត្រែង បានរៀបចំពិធីប្រគល់ថវិកាឧបត្ថម្ភមរណសង្គ្រោះសរុបចំនួន ១០.៥០០.០០០ រៀល ជូនដល់គ្រួសារសពសមាជិកសកម្មចំនួន ២រូប និងសមាជិកសកម្មដែលមានសហព័ន្ធទទួលមរណភាពចំនួន ១រូប ដើម្បីជួយសម្រាលបន្ទុកជីវភាព និងបង្ហាញពីស្មារតីសាមគ្គីភាពក្នុងអង្គភាព។

នៅក្នុងកិច្ចប្រជុំសាមញ្ញលើកទី២៨ អាណត្តិទី៤ របស់ក្រុមប្រឹក្សាខេត្តស្ទឹងត្រែង នារសៀលថ្ងៃទី ៣ ខែកញ្ញា ឆ្នាំ២០២៦ ក្រោមអធិបតីភាព ឯកឧត្តម ឈាង ឡាក់ ប្រធានក្រុមប្រឹក្សាខេត្ត ឯកឧត្តម សរ សុពុត្រា អភិបាលនៃគណៈអភិបាលខេត្តស្ទឹងត្រែង បានប្រកាសផ្តល់ជូនម៉ូតូម្នាក់មួយគ្រឿង ដល់សិស្សជ័យលាភីនិទ្ទេស (A) ចំនួន ៦នាក់ ក្នុងការប្រឡងសញ្ញាបត្រមធ្យមសិក្សាទុតិយភូមិឆ្នាំនេះ ដើម្បីសម្រួលដល់ការបន្តការសិក្សាថ្នាក់ឧត្តមសិក្សា ។