ថ្លែងក្នុងកម្មវិធីសន្ទនាមតិរបស់វិទ្យុជាតិ និងទូរទស្សជាតិខេត្ដសៀមរាប កាលពីថ្ងៃទី ៦ ខែសីហា ឆ្នាំ២០២៦ លោកស្រី ទាម ផល្លី អនុប្រធានមន្ទីពាណិជ្ជកម្មខេត្ដសៀមរាបបាន ជំរុញ និង លើកទឹកចិត្ត និងលើកកម្ពស់ការចងក្រងជាសហគមន៍កសិកម្ម និងការប្រើប្រាស់ប្រព័ន្ធទីផ្សារឌីជីថល ដោយត្រូវបានមើលឃើញថា ជាដំណោះស្រាយដ៏មានប្រសិទ្ធភាព ក្នុងការជួយឱ្យអ្នកផលិតអាចភ្ជាប់ទំនាក់ទំនងផ្ទាល់ជាមួយទីផ្សារ និងទទួលបានផលចំណេញសមរម្យជាងមុន ការចរាចរ ខណៈ ការលក់ផលិតផលក្នុងស្រុក មិនត្រឹមតែបំពេញតម្រូវការប្រចាំថ្ងៃប៉ុណ្ណោះទេ ប៉ុន្តែថែមទាំងជាសសរ ទ្រទ្រង់ទេសចរណ៍វប្បធម៌ និងកសិទេសចរណ៍ នៅខេត្តសៀមរាបទៀតផង ជាជាងការពឹងផ្អែកខ្លាំងលើឈ្មួញកណ្តាលច្រើនដំណាក់កាល ជួនកាលធ្វើឱ្យតម្លៃទំនិញនៅលើទីផ្សារកើនឡើងខ្ពស់ ខណៈដែលកសិករ និងសិប្បករដើម ទទួលបានប្រាក់ចំណេញតិចតួចប៉ុណ្ណោះ ។

អាជ្ញាធរខេត្តសៀមរាប បានណែនាំយ៉ាងម៉ឺងម៉ាត់ដល់នាយក នាយិកាសាលារៀនទាំងអស់ ហាមឃាត់ដាច់ខាតចំពោះការដុតសំរាមប្លាស្ទិកនៅក្នុងបរិវេណសាលារៀន ដើម្បីការពារសុខភាពផ្លូវដង្ហើមរបស់លោកគ្រូ អ្នកគ្រូ និងសិស្សានុសិស្ស ព្រោះផ្សែងពុលដែលភាយចេញពីការដុតកាកសំណល់ប្លាស្ទិក នឹងបង្កផលប៉ះពាល់យ៉ាងធ្ងន់ធ្ងរដល់សួត និងសុខភាពផ្លូវដង្ហើម។

មន្ត្រីក្រសួងបរិស្ថាន បានលើកឡើងថា ការយកចិត្តទុកដាក់លើការងារបរិស្ថាន និងការចេះទុកដាក់ និងបែងចែកសំរាមតាមប្រភេទនីមួយៗបានត្រឹមត្រូវ គឺជាផ្នែកមួយក្នុងការលើកកម្ពស់វិស័យទេសចរណ៍ ដោយបរិស្ថានស្អាត និងអនាម័យល្អ គឺជាកត្តាដ៏សំខាន់បំផុតក្នុងការទាក់ទាញភ្ញៀវទេសចរជាតិ និងអន្តរជាតិ ព្រោះវាជួយលើកកម្ពស់សោភ័ណភាពតំបន់រមណីយដ្ឋាន បង្កើតភាពស្ងប់ស្ញែង និងធានាបាននូវសុខភាពល្អដល់អ្នកមកទស្សនា។

គណៈកម្មាធិការសិទ្ធិមនុស្សកម្ពុជា នៅថ្ងៃទី៦-៧ ខែសីហា ឆ្នាំ២០២៦នេះ បានចុះអប់រំ ផ្សព្វផ្សាយផ្ទាល់ស្ដីពីសិទ្ធិមនុស្ស និងច្បាប់ ជូនដល់អាជ្ញាធរមូលដ្ឋានដែលជាតំណាងប្រជាពលរដ្ឋ នៅក្នុងសង្កាត់ស្វាយដង្គំ ក្រុងសៀមរាប និងឃុំកណ្ដែក ស្រុកប្រាសាទបាគង ខេត្តសៀមរាប ដើម្បីពង្រឹងការយល់ដឹងពីសិទ្ធិសេរីភាពមូលដ្ឋាន ករណីកាតព្វកិច្ចពលរដ្ឋ និងការអនុវត្តច្បាប់ក្នុងសង្គម ជួយកាត់បន្ថយទំនាស់ និងលើកស្ទួយតម្លៃសិទ្ធិមនុស្សនៅកម្ពុជា។

អគារសិក្សាថ្មី ២ខ្នង ស្មើនឹង១០បន្ទប់ និងបង្គន់អនាម័យ ២ខ្នង មាន៤បន្ទប់ ស្ថិតក្នុងវិទ្យាល័យភូមិគំរូ ឃុំស្រណាល ស្រុកក្រឡាញ់ ខេត្តសៀមរាប ត្រូវបានបើកការដ្ឋានសាងសង់ជាផ្លូវការ នៅថ្ងៃទី៦ ខែសីហា ឆ្នាំ២០២៦នេះ ក្រោមការឧបត្ថម្ភពីមជ្ឈមណ្ឌលកសាងអនាគតរបស់អ្នកថ្ងៃនេះ (BFT) ដែលការបើកការដ្ឋានមានការចូលរួមពីលោក ឃុត សំអាត ប្រធានក្រុមប្រឹក្សាស្រុក និង លោក សុខ ណារ៉េត អភិបាលស្រុក តំណាងសប្បុរសជន អាជ្ញាធរមូលដ្ឋាន លោកគ្រូអ្នកគ្រូ និងសិស្សានុសិស្សជាច្រើនរូប។

ឯកសារនៃការវិនិច្ឆ័យដីធ្លីមានលក្ខណៈជាប្រព័ន្ធចំនួន ១៨ ៥១១ក្បាលដី ក្នុងភូមិគោកវាល ភូមិទំរឹង ភូមិរើល ត្រពាំងស្វាយ ត្រពាំងឫស្សី ភូមិព្រលឹត ក្អែកទំ រំដួល ក្បាលក្រពើ ត្រពាំងធំ គោកក្នាំង គោកត្រាច ភូមិស្រះ និងភូមិសំបួរ ឃុំរើល ស្រុកពួក ខេត្តសៀមរាប ត្រូវបានមន្ត្រីជំនាញបិទផ្សាយជាសាធារណៈ ដើម្បីឱ្យប្រជាពលរដ្ឋ និងអ្នកពាក់ព័ន្ធចូលរួមពិនិត្យ និងផ្ទៀងផ្ទាត់ទិន្នន័យឱ្យបានគ្រប់ៗគ្នា ធានាបាននូវភាពត្រឹមត្រូវមុននឹងចេញបណ្ណកម្មសិទ្ធិ។