សាខាកាកបាទក្រហមកម្ពុជាខេត្តកំពង់ចាម និងព្រះមេគុណខេត្ត ព្រះមន្ត្រីសង្ឃ និងព្រះចៅអធិវត្តក្នុងស្រុក ផ្ដល់អំណោយមនុស្សធម៌ដល់ជនរងគ្រោះដោយអគ្គីភ័យ ៣គ្រួសារ ក្នុងឃុំអំពិល ស្រុកកំពង់សៀម

នៅព្រឹកថ្ងៃអង្គារ ទី ២៦ ខែឧសភា ឆ្នាំ ២០២៦ នេះ ឯកឧត្តម អ៊ុន ចាន់ដា អភិបាលខេត្ត ជាប្រធានគណ:កម្មាធិការសាខាកាកបាទក្រហមកម្ពុជាខេត្តកំពង់ចាម បានចាត់លោក ស្រី សុភ័ក្រ្ត អភិបាលរងខេត្ត និងជាលេខាធិការសាខាកាកបាទក្រហមកម្ពុជាខេត្ត រួមជាមួយព្រះវត្តមានព្រះសីលសំវរ ប៊ត តាំងឆេង ព្រះនាគមុនី ព្រះមេគុណខេត្តកំពង់ចាម និងព្រះមន្ត្រីសង្ឃ ព្រមទាំងព្រះចៅអធិកាវត្តក្នុងស្រុក អមដំណើរដោយ ឯកឧត្តមនាយកសាខា និង ព្រះសទ្ធម្មញ្ញាណ គង់ វិច្ឆិកា ព្រះអនុគណស្រុកកំពង់សៀម លោក ជឹង ម៉េងហុង អនុប្រធានអនុសាខាស្រុកកំពង់សៀម ក្រុមកាកបាទក្រហមកម្ពុជាឃុំ និងអ្នកស្ម័គ្រចិត្តភូមិ បាននិមន្តនិងអញ្ជើញចុះសួរសុខទុក្ខ ដោយនាំយកអំណោយមនុស្សធម៌ របស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជូនពលរដ្ឋ ៣គ្រួសារ នៅភូមិអណ្តូងច្រុះ ឃុំអំពិល ស្រុកកំពង់សៀម ដែលរងគ្រោះដោយអគ្គីភ័យ មូលហេតុ ឆ្លងចរន្តអគ្គិសនី បណ្តាលអោយផ្ទះឈើ ប្រក់ក្បឿង ២ខ្នងជាប់គ្នា ទំហំ ៥ម × ១៥ម ត្រូវភ្លើងឆេះអស់ទាំងស្រុង និងប៉ះពាល់ដល់ផ្ទះមួយខ្នងទៀត ត្រូវភ្លើងឆេះរោលខ្លោចជញ្ជាំងមួយចំហៀង កាលពីព្រឹក ម៉ោង ៨,៣០នាទី នាថ្ងៃទី២៥ ខែឧសភា ឆ្នាំ ២០២៦ ។